Mijëra familje në Greqi pritet të përfitojnë një ndihmë të re financiare në vitin 2026, si pjesë e masave për të lehtësuar barrën e kostos së jetesës.
Sipas kuadrit të ri ligjor, ndihma do të jetë 150 euro për çdo fëmijë në ngarkim dhe do t’u jepet familjeve që plotësojnë kriteret e përcaktuara të të ardhurave.
Përfitues do të jenë rezidentët tatimorë në Greqi, ndërsa llogaritja do të bëhet mbi bazën e të ardhurave të deklaruara për vitin fiskal 2024.
Për çiftet e martuara ose në bashkëjetesë civile, kufiri maksimal i të ardhurave familjare vendoset në 40 mijë euro. Ky kufi rritet me 5 mijë euro për çdo fëmijë shtesë, duke zgjeruar ndjeshëm numrin e familjeve përfituese.
Për familjet me një prind, kufiri i të ardhurave është deri në 39 mijë euro, edhe ky i rritshëm në varësi të numrit të fëmijëve në ngarkim.
Një nga elementët kryesorë të masës është se pagesa do të bëhet automatikisht, pa aplikim. Autoritetet do të përdorin të dhënat nga deklaratat tatimore dhe regjistrat përkatës, ndërsa shuma do të kreditohet në llogarinë bankare IBAN të regjistruar në aplikacionin myAADE.
Pagesa kryesore parashikohet të përfundojë deri më 30 qershor 2026. Ndërkohë, për rastet kur familjet deklarojnë një fëmijë të ri në ngarkim pas verifikimit fillestar, është parashikuar një pagesë shtesë deri më 31 gusht 2026.
Ndihma do të jetë e përjashtuar nga taksat, nuk do të llogaritet si e ardhur për përfitime të tjera sociale dhe nuk do të mund të sekuestrohet apo të kompensohet me borxhe ndaj shtetit, fondeve të sigurimeve apo institucioneve të tjera.
Qeveria greke synon që përmes kësaj mase të rrisë të ardhurat e disponueshme të familjeve me fëmijë, në një periudhë kur çmimet e larta dhe kostoja e jetesës mbeten problem për një pjesë të madhe të familjeve.
