Vetmia po shndërrohet në një nga problemet më të mëdha sociale të kohës moderne dhe industria globale e mirëqenies ka gjetur një treg të ri miliardash: paketat luksoze për përballimin e pikëllimit dhe humbjes.
Sipas raportit të fundit të Organizatës Botërore të Shëndetësisë për lidhjet sociale, një në gjashtë persona në botë përjeton vetmi të rëndë dhe afatgjatë.
Izolimi kronik social lidhet me një rritje prej 30% të rrezikut të vdekjes së parakohshme, ndërsa kostot ekonomike të depresionit dhe ankthit të lidhura me vetminë arrijnë në rreth 1 trilion dollarë në vit.
Në këtë realitet të ri, krahas spa-ve, retreat-eve të yogës dhe programeve detox, po shfaqet një kategori e re: “grief retreats”, ose pushime të dedikuara për përballimin e humbjes dhe zisë.
Resorte të njohura në Meksikë, SHBA, Kosta Rika dhe vende të tjera ofrojnë programe që përfshijnë terapi në grup, ecje në natyrë me këshilltarë të specializuar, seanca meditimi, “sound baths”, vakte në heshtje dhe madje edhe terapi me kuaj.
Programet variojnë nga disa qindra dollarë për një fundjavë deri në mbi 3,500 dollarë për pak ditë trajtim privat, ndërsa në segmentin luksoz të tregut çmimi prej rreth 1,000 dollarësh në ditë konsiderohet tashmë normal.
Fenomeni po lidhet me ndryshimet e thella sociale të dekadave të fundit. Ekspertët theksojnë se komunitetet tradicionale, organizatat lokale, grupet shoqërore dhe marrëdhëniet e afërta janë dobësuar ndjeshëm, ndërsa përdorimi masiv i telefonave inteligjentë dhe rrjeteve sociale ka rritur ndjenjën e izolimit për shumë njerëz.
Megjithatë, specialistët paralajmërojnë se pikëllimi nuk zgjidhet me pak ditë pushime apo me eksperienca luksoze. Sipas tyre, procesi i zisë kërkon kohë, mbështetje nga familja dhe miqtë, si dhe lidhje reale njerëzore.
Për shumë analistë, fakti që njerëzit po paguajnë mijëra dollarë për të gjetur hapësirë ku të qajnë dhe të ndihen të dëgjuar nuk është zgjidhja e problemit të vetmisë, por një simptomë e një shoqërie ku lidhjet njerëzore po bëhen gjithnjë e më të rralla. /skyweb.al
