Prokuroria e Posaçme ka kërkuar marrjen në pyetje të dhjetëra dëshmitarëve në procesin gjyqësor ndaj ish-presidentit Ilir Meta dhe deputetes Monika Kryemadhi.
Kërkesa është depozituar në gjykatë, por deri tani nuk ka ende një vendimmarrje nëse lista e dëshmitarëve të propozuar nga SPAK do të pranohet.
Në listën e personave që Prokuroria e Posaçme kërkon të thirren si dëshmitarë janë Jozef Hajsek, Ervis Mataj, Ardian Shatku, Pirro Xhixho, Ema Çoku, Esmeralda Shkjau, Kastriot Ismailaj, Vojsava Ismailaj, Milena Harito, Përparim Spahiu, Sokol Hysenaj, Majlind Lazimi, Agron Çela, Luan Rama, Endrit Brahimllari, Petrit Vasili, Spartak Braho, Ilir Kulla, Nasip Naço, Vangjel Tavo, Lindita Troka, Baton Haxhiu, Erjol Brahimllari, Damian Gjiknuri dhe Ralf Gjoni, ndërsa më herët janë pyetur Marin Gjonaj dhe zyrtarë publik.
Procesi ndaj Metës dhe Kryemadhit lidhet me akuzat për korrupsion, pastrim parash dhe fshehje të pasurisë. Në fokus të dosjes janë çështja CEZ-DIA dhe kontratat e lobimit në Shtetet e Bashkuara të Amerikës.
Pjesë e procesit janë edhe të pandehur të tjerë. Fatima Kryemadhi dhe Ema Çoku akuzohen për pastrim parash, ndërsa Pirro Xhixho për korrupsion.
Ish-presidenti Ilir Meta i ka mohuar akuzat dhe ka pretenduar se procesi ndaj tij është i motivuar politikisht.
Vendimi i gjykatës për kërkesën e SPAK pritet të përcaktojë nëse dëshmitarët e propozuar do të thirren për t’u pyetur gjatë shqyrtimit gjyqësor.
