Rama i kërkoi të heshtë, Spiropali e sfidon PUBLIKISHT duke i treguar se ç’ duhet të bëjë me PS-në, teksa në parti flitet se ajo po sjell njerëz në shesh kundër “Skënderbeut”

Thonë që dashuritë e mëdha sjellin dhe maraz dhe zhgënjime të mëdha.

Përplasja e brendshme në Partinë Socialiste duket se nuk është mbyllur, pavarësisht paralajmërimit publik të kryeministrit Edi Rama ndaj Elisa Spiropalit.

Pak ditë pasi Rama i kërkoi Spiropalit të mos flasë më për mënyrën se si ecin punët brenda PS-së, duke i kujtuar se e kishte falur dy herë dhe se nuk kishte më vend për një falje të tretë, ish-ministrja e “deklasuar” nga Rama ka zgjedhur të reagojë sërish publikisht duke sfiduar drejtpërdrejt Skënderbeun e saj.

Në një status në Facebook, Spiropali shkruan se Partia Socialiste duhet të “gjejë forcat”, të “mbledhë mendjen” dhe të “vetëpastrohet”, për t’u bërë më dinamike, më demokratike dhe më kompakte.

“Për ta arritur këtë, Partisë Socialiste i duhet të gjejë forcat, të mbledhë mendjen, të vetëpastrohet, të bëhet më dinamike, më demokratike, më kompakte, për të mbetur gjithmonë e re, gjithmonë e pastër, pa smërçe, pa ndryshqe, pa pehlivanllëqe”, shkruan Spiropali.

Ky reagim lexohet si një sfidë e hapur ndaj linjës së Ramës, i cili i kishte kërkuar të mos vijonte më me komente publike për zhvillimet e brendshme në parti.

Dikur Mamicë e Skënderbeut, Spiropali ngreh shpatën e opozitarizmit në PS: Shpirtkatranët, qen që s’më kafshojnë

Statusi vjen në një moment kur mijëra protestues e kanë vënë Ramën në cep dhe i kërkojnë dorëheqjen, atij dhe Berishës. Madje, brenda selisë rozë po qarkullon versioni se ajo mund të ketë pasur rol në organizimin e disa personave nga diaspora që protestuan kundër Ramës një ditë më parë në Tiranë.

Këto zëra, edhe pse të pakonfirmuar zyrtarisht, duket se e kanë rënduar jo pak pozicionin e saj politik në raport me kryeministrin dhe drejtimin aktual të partisë.

Mesazhi i saj vjen si një goditje e tërthortë për gjendjen e brendshme të PS-së, duke nënkuptuar se partia ka nevojë për pastrim, rinovim dhe largim të praktikave që ajo i cilëson si “ndryshqe” e “pehlivanllëqe”.

Për momentin, nuk ka një reagim të ri nga kryeministri Rama ndaj këtij statusi, por ish-Mamica e tij e ka sfiduar hapur dhe tashmë ai do të dukej i dobët…jo vetëm përballë algoritmit nëse nuk do të bente atë ka thënë se do të bëjë kur Spiropali t’i bënte “tre”. /skyweb.al