Balerinët, valltarët dhe akrobatët që punojnë në institucionet publike të artit dhe kulturës mund të kalojnë në një skemë të posaçme financiare që në moshën 47 vjeç, sipas një projektligji të ri të hedhur për konsultim publik.
Nuk bëhet fjalë për uljen e moshës së pensionit në 47 vjeç. Projektligji parashikon që, në këtë moshë, artisti mund të përfundojë veprimtarinë skenike dhe të marrë trajtim financiar nga shteti deri në momentin kur fiton të drejtën për pension.
Për akrobatët, balerinët dhe valltarët kërkohet mosha 47 vjeç, të paktën 15 vite performancë skenike dhe 15 vite sigurime shoqërore.
Për këngëtarët lirikë solistë kufiri është 57 vjeç, me të paktën 20 vite performancë dhe 20 vite sigurime, ndërsa këngëtarët koristë duhet të kenë 20 vite performancë dhe 25 vite sigurime.
Plotësimi i këtyre kushteve parashikohet të përbëjë shkak të posaçëm ligjor për përfundimin e marrëdhënies së punësdhe kalimin e artistit në skemën financiare.
Për pesë vitet e para, përfituesi do të marrë 70% të pagës bruto të muajit të fundit të punës. Pas pesë vitesh, pagesa zbret në 50% të pagës neto të referencës për profesionin përkatës dhe vazhdon deri në pension.
Gjatë kësaj periudhe, shteti do të paguajë edhe kontributet shoqërore dhe shëndetësore, ndërsa vitet do të njihen si periudhë sigurimi.
Skema nuk përfshin të gjithë artistët. Në draft përcaktohen vetëm akrobatët, balerinët, valltarët, këngëtarët lirikë solistë dhe këngëtarët koristë që kanë qenë të punësuar në institucione publike të artit dhe kulturës.
Projektligji është ende në konsultim dhe parashikon hyrjen në fuqi më 1 janar 2027, nëse miratohet në këtë formë. /skyweb.al
