Ukraina ka njoftuar zyrtarisht Organizatën Ndërkombëtare të Aviacionit Civil, ICAO, se hapësira ajrore e Rusisë po bëhet gjithnjë e më e pasigurt për aviacionin civil për shkak të intensifikimit të aktivitetit ushtarak.
Ministri i Jashtëm ukrainas, Andrii Sybiha, u bëri thirrje kompanive ajrore dhe qeverive që të shmangin fluturimet në hapësirën ruse dhe të marrin në konsideratë rritjen e rrezikut.
Paralajmërimi vjen pasi presidenti Volodymyr Zelensky deklaroi se operacionet gjithnjë e më të mëdha me dronë do ta bëjnë qiellin rus të papërshtatshëm për trafikun normal civil.
Zelensky theksoi se Ukraina nuk synon avionët civilë, por paralajmëroi se prania e dronëve në hapësirën ajrore ruse do të rritet ndjeshëm.
Në fokus janë veçanërisht kompanitë që vazhdojnë të fluturojnë drejt Moskës, Shën Petersburgut dhe aeroporteve të tjera kryesore ruse.
“Ditët e sigurta në qiellin rus kanë mbaruar”, ishte mesazhi i presidentit ukrainas, i cili tha se lufta po rikthehet tashmë edhe në territorin rus.
Aeroportet ruse janë përballur gjatë muajve të fundit me mbyllje të përkohshme dhe ndërprerje të fluturimeve gjatë sulmeve ukrainase me dronë.
Kievi thotë se sulmet e tij me rreze të gjatë synojnë objektiva ushtarake dhe infrastrukturë që mbështet luftën ruse, përfshirë aeroporte ushtarake, rafineri dhe objekte energjetike. /skyweb.al
