Banka e Shqipërisë ka publikuar rregulloren e re për tarifat e shkëmbimit në transaksionet e pagesave me kartë, e cila synon të ulë komisionet që bankat u aplikojnë bizneseve për pranimin e këtyre pagesave.
Sipas rregullores, duke filluar nga 1 janari 2027, tarifat e shkëmbimit nuk do të mund të kalojnë 0,2% të vlerës së transaksionit për kartat e debitit dhe 0,3% për kartat e kreditit. Këto tarifa janë një nga elementet kryesore të kostos që tregtarët paguajnë për çdo shitje me kartë.
Aktualisht, komisionet totale që paguajnë bizneset për pagesat me kartë mund të kalojnë 3% në rastin e kartave të lëshuara jashtë vendit, ndërsa për kartat vendase janë më të ulëta. Krahas tarifës së shkëmbimit, në këtë kosto përfshihen edhe tarifat e rrjeteve ndërkombëtare, si Visa dhe Mastercard, si dhe marzhi i bankës që ofron shërbimin e pagesave.
Banka e Shqipërisë vlerëson se ndryshimet mund të sjellin uljen e komisioneve totale deri në 1%. Megjithatë, përfaqësues të sektorit bankar e konsiderojnë më realist një nivel rreth 1,5%.
Rregullorja parashikon gjithashtu më shumë transparencë për tregtarët, duke kërkuar që bankat të bëjnë të dallueshme tarifat e shërbimit dhe tarifat e shkëmbimit për çdo transaksion. Ky detyrim do të hyjë në fuqi më 1 janar 2028, për t’u dhënë kohë bankave dhe rrjeteve të pagesave të përshtatin sistemet e tyre. /skyweb.al
















