SPAK ka zgjeruar hetimet në kuadër të operacionit që goditi një grup të dyshuar të trafikut ndërkombëtar të kokainës, duke urdhëruar kontrolle në 23 banesa, zyra dhe shoqëri tregtare.
Sipas SPAK, grupi kriminal drejtohej nga Salvatore Aliu, Shpëtim Aliu, Dritan Gjika, Eldi Dizdari dhe Armando Pacani, të cilët dyshohet se kanë qenë të përfshirë në trafikun e sasive të mëdha të kokainës nga Amerika Latine drejt vendeve të Bashkimit Europian.
Në zbatim të vendimeve të gjykatës, hetuesit e Byrosë Kombëtare të Hetimit kanë ushtruar kontrolle në disa ambiente që lidhen me persona dhe kompani të përmendura në hetim.
Kontrollet janë kryer te Redi Peza, pronar i shoqërive “Porto Lalzi” dhe “Sviluppo Mare”, te biznesmeni Ardi Kollçaku, pronar i “Anchor Invest”, si dhe te Kujtim Shtufi dhe kompania “Ferro Beton” sh.p.k.
SPAK dyshon se një pjesë e të ardhurave të përfituara nga trafiku ndërkombëtar i kokainës janë futur në ekonominë shqiptare përmes investimeve në ndërtim, pasuri të paluajtshme dhe projekte turistike.
Hetimi po përqendrohet te gjurmimi i lëvizjeve financiare, transaksioneve bankare, kontratave dhe lidhjeve të mundshme mes kapitalit të dyshuar kriminal dhe investimeve në sektorë të ndryshëm të ekonomisë.
Sipas hetuesve, skema e dyshuar synonte pastrimin e parave të drogës duke i kanalizuar ato në aktivitete të ligjshme, kryesisht në tregun e pronave dhe ndërtimit, një sektor që vitet e fundit është konsideruar me rrezik të lartë për qarkullimin e kapitalit me burim të paqartë.
Kontrollet në banesa, zyra dhe kompani janë pjesë e përpjekjeve të SPAK për të siguruar dokumente, pajisje elektronike dhe prova të tjera që mund të ndihmojnë në zbardhjen e rrjetit financiar të grupit.
Akuzat dhe dyshimet e ngritura nga SPAK mbeten për t’u provuar në gjykatë. /skyweb.al
