Presidenti i SHBA-së, Donald Trump, ka nënshkruar një urdhër që bën thirrje për më pak vaksina në fëmijëri dhe gjithashtu rekomandon ndarjen e vaksinës kundër fruthit, shytave dhe rubeolës (MMR) në vaksina të veçanta.
“Dekada më parë, fëmijët merrnin vetëm një pjesë të vogël të vaksinave që kërkohen sot”, tha Trump. “Në ato kohë, njerëzit ishin shumë më të shëndetshëm dhe, sigurisht, normat e larta të autizmit që vërehen sot nuk ekzistonin.”
Presidenti ka shprehur prej kohësh dyshime mbi sigurinë e vaksinave MMR, por studime të shumta kanë treguar se nuk ka asnjë lidhje midis këtyre vaksinave dhe autizmit.
Ekspertët e shndetësisë e kanë kritikuar urdhrin e ri dhe kanë thënë se ai mund të ulë normat e vaksinimit dhe t’i ekspozojë fëmijët ndaj sëmundjeve të rrezikshme.
Urdhri i Trump rekomandon gjithashtu që numri i vaksinave të fëmijërisë të ulet në 11, nga 18 që aktualisht rekomandohen nga Akademia Amerikane e Pediatrisë (AAP).
Urdhri i Trump shërben si udhëzim dhe jo si detyrim, pasi vaksinat e kërkuara për frekuentimin e shkollës përcaktohen në nivel shtetëror dhe jo nga qeveria federale.
Imunizimet e rekomanduara për të gjithë fëmijët sipas këtij urdhri janë kundër fruthit, shytave, rubeolës, difterisë, tetanozit, pertusisit (kollës së mirë), poliomielitit, Haemophilus influenzae tip B, sëmundjes pneumokoksike, virusit të papillomës njerëzore (HPV) dhe variçelës (lia e dhenve).
“Po i reduktojmë ato”, tha Trump. “Nuk është vetëm çështja që po bëni më pak vaksina ose ‘gjilpëra’, siç u thonë, por po i bëni ato gjatë një sërë vizitash te mjeku.” /skyweb.al
