Një avion i rrallë elektrik ka zbritur në qytetin e dytë më të madh të Norvegjisë, Bergen, në fillim të këtij muaji. Avioni, i quajtur Alia, përshkoi 160 kilometra për 55 minuta duke fluturuar vetëm me energji nga bateritë.
I prodhuar nga kompania amerikane Beta Technologies, ky avion elektrik është projektuar për transport mallrash dhe ka kapacitet ngarkese deri në 560 kg.
Fluturimi simuloi një linjë të planifikuar të transportit ajror midis qyteteve bregdetare Stavanger dhe Bergen. Gjatë muajve të ardhshëm do të realizohen teste të tjera, si pjesë e përpjekjeve të Norvegjisë për të zhvilluar një aviacion me emetime të ulëta.
“Nëse e bën me makinë, zgjat katër orë e gjysmë. Ne e bëmë në 52 minuta”, tha piloti Jeremy Degagne.
“Ky është një moment i rëndësishëm për Norvegjinë si një arenë ndërkombëtare testimi,” thotë Karianne Helland Strand, drejtoreshë në kompaninë që menaxhon aeroportet norvegjeze, Avinor.
Test-fluturimet në Norvegji vijnë pas një turi të shpejtë në Evropë, që nisi në Irlandë dhe përfshiu prezantimin e Alia-s në panairet ajrore të Farnborough dhe Parisit, si dhe ndalesa në Gjermani dhe Danimarkë. /sKYWEB.AL
