SHBA godet rrjetin “Homeland Justice”, sekuestrohet faqja e lidhur me sulmet ndaj Kuvendit
Autoritetet amerikane kanë ndërmarrë një operacion kundër një rrjeti kibernetik të dyshuar për sulme ndaj institucioneve shtetërore, duke sekuestruar faqen “Homeland Justice”, e cila lidhet edhe me sulmin ndaj Kuvendit të Shqipërisë.
Sipas njoftimeve zyrtare, veprimi është pjesë e një aksioni më të gjerë të Departamentit Amerikan të Drejtësisë kundër infrastrukturave online të lidhura me Iranin. Në total janë bllokuar pesë faqe që dyshohet se janë përdorur për propagandë, shpërndarje materialesh të vjedhura dhe kërcënime ndaj individëve.
Hetimet e zhvilluara nga FBI kanë zbuluar se rrjeti përdorte publikime në internet për të ndikuar opinionin publik, për të përhapur përmbajtje radikale dhe për të ushtruar presion ndaj gazetarëve, aktivistëve dhe personave të lidhur me komunitetin iranian. Në disa raste, sipas hetimeve, janë publikuar edhe thirrje me shpërblime financiare për sulme ndaj personave të caktuar.
Ndërkohë, disa ditë më parë, Kuvendi i Shqipërisë u përball me një incident kibernetik që paralizoi përkohësisht sistemet e brendshme. Deputetët dhe stafi raportuan mungesë aksesi në kompjuterë dhe email-e, ndërsa një pjesë e të dhënave u publikua në platformën Telegram nga i njëjti grup.
Në mesazhet e publikuara, grupi pretendonte se kishte në dorë korrespondencën e brendshme të Kuvendit dhe lëshonte kërcënime të drejtpërdrejta ndaj anëtarëve të institucionit.
Paralelisht, disa deputetë kanë marrë edhe email-e të dyshimta nga burime të jashtme, ku paralajmëroheshin të mos hapnin linke apo dokumente të bashkëngjitura, për shkak të rrezikut të komprometimit të sistemeve.
