EasyJet deklaron se nuk pret probleme me furnizimin me karburant gjatë verës, pavarësisht krizës së krijuar nga lufta me Iranin dhe tensionet në Lindjen e Mesme.
Megjithatë, kompania thotë se pasiguria po i bën udhëtarët të rezervojnë pushimet dhe fluturimet në momentet e fundit.
Drejtori i EasyJet, Kenton Jarvis, tha për BBC se kompania nuk ka hasur mungesa karburanti në aeroportet ku operon në Britani dhe Europë dhe se fluturimet verore do të zhvillohen normalisht.
Sipas tij, pasagjerët nuk duhet të shqetësohen apo të krijojnë panik, pasi EasyJet nuk planifikon anulime për shkak të karburantit dhe nuk do të vendosë tarifa shtesë mbi biletat.
Lufta me Iranin dhe tensionet në rajonin e Gjirit kanë shkaktuar rritje të fortë të çmimit të karburantit për avionët, pasi ngushtica e Hormuzit, një nga rrugët kryesore të transportit të naftës dhe karburantit në botë, është bllokuar pjesërisht. Kjo situatë bëri që çmimi i karburantit ajror në Europë të rritej nga rreth 831 dollarë për ton në fund të shkurtit në deri 1,838 dollarë për ton në fillim të prillit.
Aktualisht çmimi ka rënë në rreth 1,300 dollarë për ton, por mbetet shumë më i lartë se më parë.
EasyJet thotë se deri tani ndikimi më i madh nuk është mungesa e karburantit, por sjellja më e kujdesshme e udhëtarëve. Sipas kompanisë, njerëzit po presin më gjatë për të bërë rezervime, duke parë zhvillimet ekonomike dhe konfliktet ndërkombëtare para se të vendosin për pushimet.
Edhe kompani të tjera turistike kanë raportuar të njëjtin fenomen. Jet2 dhe TUI Group kanë deklaruar se rezervimet po bëhen shumë afër datës së nisjes.
EasyJet raportoi gjithashtu humbje prej 552 milionë paundësh për gjashtëmujorin deri në mars, ndërsa kompania paralajmëron se kostot e larta të karburantit mund të ndikojnë fitimet gjatë muajve të ardhshëm./skyweb.al
