Protesta kundër qeverisë ka hyrë këtë të diel në ditën e 15-të, me mijëra qytetarë që u mblodhën sërish para Kryeministrisë për të kërkuar dorëheqjen e kryeministrit Edi Rama dhe të mazhorancës socialiste.
Tubimi masiv ka tërhequr edhe vëmendjen e turistëve të huaj që ndodheshin në Tiranë. Jo pak prej tyre janë ndalur për të ndjekur protestën, ndërsa disa u janë bashkuar qytetarëve të mbledhur në bulevard.
Pjesëmarrja e turistëve është vërejtur edhe gjatë ditëve të tjera të protestës, ku vizitorë të huaj kanë fotografuar, filmuar dhe ndjekur nga afër zhvillimet para Kryeministrisë.
Pamjet e turistëve mes protestuesve kundërshtojnë pretendimet se tubimet po i largojnë vizitorët nga kryeqyteti. Kryeministri Rama ka deklaruar më herët se protestat po ndikojnë në uljen e rezervimeve turistike, por tubimet e përditshme vijojnë të tërheqin interesin e të huajve që ndodhen në Tiranë.
Protestuesit kërkojnë largimin e qeverisë, ndërsa kanë paralajmëruar vijimin e tubimeve deri në plotësimin e kërkesave të tyre.
